Nan Tareh Marapuang

Batamu dalam papatah, didalam patitih kato adat, caro di alam Minangkabau, nan bak andai jo gurindam:

Satinggi-tinggi malantiang  Lah tibo diawang-awang  Suruiknyo katanah juo  Sahabih canggah nan jo rantiang  Ditateh kulik jo batang  Tareh panguba lah basuo

Satinggi-tinggi bangau tabang  Babaliak juo kakubangan  Walau jauah dirantau urang  Pulang kakampuang jo halaman

Papatah patitiah nan baitu, ramalan budi Sutan Balun, jatuah lansuang kausaho, diamakan sampai kakampuang, isuaklah baru mangko nyato. Tibo dikampuang jo halaman, dirunuik bana nan dahulu, ditagakan kato nan hak, bana disitu kamambangun, nan tareh disanan marapuangnyo. Itulah sabab karanonyo, deklah bacinto adok pulang, nak mambaiki adat nan bapakai, tariak baleh nak nyo habih, nak aman anak kamanakan, jan rugi koto jo nagari, hokum nak tibo dinan baiak. Malah tibo di Pariangan, lah sampai di Padang Panjang, ditutuah dahan nan mahambek, ditateh cangga jo rantiang, dinyatokan lahia nan jo batin, tibo nan hak pai bata, itulah jalan kanyo tampuah.  Lah tibo hari elok, lalu malangkah Sutan Balun, maninggakan Liuang banua Cino, balaia tunggang madok pulang, manyonsong ombak lauik Cino, manampuah riak jo galombang. Salamo dalam pajalanan, rintang dek pikia siang malam, bimbang mangana nan katumbuah, raso lah tampak nan katajadi, rancangan alah jo pabuek, dirumah tingga malakukan. Lah lamo ditangah lauik, dapek angina lajulah dandang, tanang angina takatuang-katuang, babapo nyo ombak mahampehkan, tapi tujuan tidak barubah, pidoman pitunjuak lah diganggam. Dek lamo dalam palayaran, jauah lah basarang hampia, lah tingga lautan Cino, handak manjalang Pulau Tujuah, kinilah lapeh dari situ, manuju Riau hanyo lai, dek pikiran lah dikampuang, lah lupo babilang hari tak tantu pakan nan talampau, lauik Malako lah talansuang, lah masuak lauik Karimun, kapulauan Riau dilalui. Disitu barunyo tasintak, dari lamunan buah pikia, udaro kampuang mambangunkan, lapeh nan dari lauik barombak, lalu manampuah tanah darek, muadiak Kuantan Batang Hari, masuak kaalam Minangkabau, ka Sijunjuang Koto Tujuah, tibo di Luhak Tanah Data. Lah sampai kakorong kampuang di Pariangan jo Padang Panjang, naiak kaateh rumah tango, jo ayah bajawek tangan, bakato Cati Bilangpandai: Syukurlah buyuang lai babaliak pulang, disangko bak batu jatuah kalubuak, bak hujan jatuah kakasiak, tidak katimbua-timbua lai. Mandanga kato nan bak kian, manjawab pulo Sutan Balun: Kato ayah sabananyo kok tidak lautan kapitunjuak, antah tatampuah adok pulang.  Mujua ditangah lauik Cino, dapek maniru manuladan, riak galombang pamandangan, alam nan leba kapitunjuak. Tampak ditangah lauik dalam, sangketo riak jo

galombang, dandam ombak jo pasia. Sapasai riak mamacah, dek ombak baguluang juo, bak ombak parang jo pasia, antah pabilo kadamainyo, tapi dek angin nan sasinga, ditiup angin kaudaro, tabang mambubuang jadi awan, manjalang naiak kaudrao, lah dingin paneh nan sasinga, dek lah dingin udaro sajuak, turn kabumi jadi hujan, jatuah kadalam rimbo dalam, suruik kaasa jadi aia, hilia manjadi anak sungai, kalauik juo kumbalinyo, itu dek hambo jadi tuladan, buliah didalam pajalanan, tampak dirantau tanah Cino, patuik ditiru jo dicontoh, itu nan hambo amakan, cinto kaayah labiah pulo, rindu kamandeh nan mahimbau.  Mandanga jawaban Sutan Balun galak bagumam rang tuonyo, bacampua suko jo duko, aia mato cucua ndak nyo kana. Suko mandanga buah handai, kato kiasan jolong tumbuah, isi pandapek pangalaman, mambayang batin kanan tahu, tampak dek pandangan hati, panuah malimbak kanan lahia. Rusuah mamikia kanan datang, apokoh garan kalanjutannyo, kilek rundiang manuju paham, baying kato dalam ma’ana, rumik nan pandai mandalami,payah budiman manyalisiak.  Agaklah hari nan saharitu, tampek sapinteh dek rang kampuang, Sutan Balun nan lah babaliak, tahu sorang tahu baduo, lah rewak sapanuah kampuang, tabatiak hiia jo mudiak, tabendang masuak nagari. Tasabuik urang nan banyaktu, samo baniat nak manjalang, nak maninjau Sutan Balun, hubungan batin nan manyaru, budi bicaro nan dahulu, paham nan baiak nan mamanggia.  Dek dubalang jo ampang limo, lalu dihimbau dikatokan kapado Sutan Maharajo Basa, bahaso lah pulang Sutan Balun. Pihak dek Sutan Maharajo Basa, baru mandanga kaba itu, suko hati bukan kapalang, babaliak sumarak kampuang, timbua harapan maso datang, karuah kajaniah diharokan, suruik bak caro nan saisuak, antaro awak badunsanak. Dirumah mandeh Sutan Balun, urang lah siliah baganti, lah pai-pai datang, tibo ampek pai batigo, lah panuah rumah nan gadang, maliek dagang jolong pulang.  Tasabuik Sutan Maharajo Basa, sangatlah ingin dalam hati, kareh cintaan kiro-kiro, nak batamu jo adiak kanduang,untuak baandai bahadapan, barundiang batamu muko, mauleh guntiang nan lah putuih, manyambuang tali kasiah sayang, hubungan awak badunsanak. Jajak tatukak tasindorong, dek capek kaki tak diagak, mandaki nan lincia kandak hawa, sampai jatuah kanan buruak, tajun kajurang papacahan, kangarai sangketo hati, kini baniaik nak mambaiki. Langkah tadorong nan dahulu, lah  patuik bana disuruikan, nak lipua jajak nan tak elok, maso sangketo jan balamo, nak aman koto jo nagari, samo babaliak kanan bana, itu nan labiah niat hati. Sabalun baliau pulang, manamui adiak kanduang diri, disuruahlah dubalang manyampaikan, bahaso baliau balun pulang, batamu muko jo dunsanak, rago mananti tamu pulang, sanang barundiang bapaserak. Titah baturik dek dubalang, lalu bajalan maso itu, manuju tampat Sutan Balun, dirumah Puti Indahjaliah, ibu Sutan Maharajo Basa sarato jo Sutan Balun. Dek lamo  lambek bajalan, lah tibo tangah halaman, lalu naiak nyo sakali. Tibo diateh rumah gadang, salam taunjuak dek dubalang, lah sampai bajawek tangan, duduak batutua jo barundiang, samo jo tamu sabanyaktu. Dek dubalang nan pisuruah, disampaikan pasan Sutan Maharajo Basa, kapado adiaknyo Sutan Balun.  Lah sabanta kecek mangecek, tanyo mananyo kaadaan, pangalaman hiduik timba baliak, salamo bacarai-carai. Dek diri Sutan Balun sambia manyalam minum aia, dalam barundiang nan baitu, ditinjau salamo nyo tinggakan, caro mauleh tak mangasan, bagai mambuhua tak babuku, kaadan Sutan Maharajo Basa, lahia jo batin

disalami. Dek elok juluak jo kaiknyo, muluik manih bicaro haluih, jadi kunci pambukak paham, taruah dubalang bak katidiang, saketek tidak nan manyiso, tidak nyo sadari lah tabincang, kapado diri Suatn Balun.  Mandanga uraian dari dubalang, pihak didiri Sutan Balun, galak bagumam dalam hati, batin taruhan lah taruwah, simpanan paham lah tasingkok, paham Sutan Maharajo Basa, alah ma’alum dalam hati. Lah lamo barundiang-rundiang, lah pueh babincang-bincang, pihak didiri Sutan Balun, dalam barundiang jo batutua, kiro-kiro kamari pai, pangana bajalan juo. Mamikiakan jalan nan kadituruik, mancari ba’a nan kaelok, nak lahia bukti nan nyato, nan jaleh tampak dek rang banyak, salahnyo undang-undang tariak baleh, tidak mambao kanan baiak, sakik surang sakik baduo, hilang nan mati dek tabunuah, nan mambunuah kahilang pulo, mampabanyak karusakan, paham handaknyo urang nagari, nak langsuang tujuan nan dahulu. Dalam dibincang nan bak kian, pihak didiri hulabalang, dek pueh barundiang-rundiang, titahpun sudah tajalankan, lalu mamintak izin rela, handak babaliak hanyo lai, pulang katampat kadiaman. Lah buliah izin nan nyo mintak, turun dubalang maso itu, lah tingga tamu nan lain, barundiang jo Sutan Balun. Pihak dek diri Sutan Balun hatinyo arok-arok cameh, mananti Sutan Maharajo Basa, tapi nan tidak kunjuang tibo, mungkin bak kato hulubalang, rago mananti urang langang,habih urang ateh rumah, tidak batamu nan taduduak, nak suni duduak mangecek, jan lahia didanga urang. Baru takana nan baitu, sanang juo dalam hati,lambek datang lai katibo, lambek lago lai kamanang, nantikan sajo katikonyo. Namun barisuak pagi hari, Datanglah Sutan Maharajo Basa, pulang karumah mande kanduang, maliek adiak jolong pulang, baru babaliak dari jauah, lah lamo dirantau urang. Lah sampai batamu muko, lalu bajawek tangan, galak babaua jo tangih, bak paneh manganduang hujan, wallahualam raso hati, pulang pahamnyo kajauhari.  Raso hati nan bak itu, biaso bana tajadinyo, didorong suko basasalan, lah rapek ganggang salamoko, antaro awak badunsanak. Buruak disangko tak kaelok, ratak bak raso lah ka pacah, sakik disangko tak kasambuah, kini nan jauah dahulu, lah bak ayam pulang kapautan, lah patuik basuko hati, lahia kagalak nan bagumam, sanyum dibibia manunjuakan. Dek takana asa jo mulo, asanyo ratak nan katumbuah, mulonyo nan rapek kajadi ranggang, sasalan tibo dalam hati, sadang suko itu tapikia, basabuang didalam hati, batin rohani manangguangkan. Lah sudah bajawek tangan, duduak basamo tangah ruamah, kecek-mangecek jo dunsanak, tanyo batanyo kaadaan, nan dirantau jo dirumah, timba baliak samo mambari, sananglah hati kaduonyo. Dalam barundiang maso itu, tidak nan lain nan tabincang, samato tando samo suko, samo manampakan muko janiah, mambayangkan suko timba baliak, tidak manyimpang kanan lain. Sapasai dek barundiang-rundiang, dek mandeh nasi lah tahedang, lah samo makan kaduonyo, sarato ibu jo ayah, jo kaum karabat nan basamo. Sasudah makan jo minum, turnlah Sutan Maharajo Basa dari rumah mande kanduang, mangiriang dubalang dibalakang, Sutan Balun mahantakan, turun sahinggo laman panjang, tando dibatin diharagoi, hormat kapado kako tuo. Bajalan Sutan Maharajo Basa,dubalang mangiriang dibalakang, manuju kapintu korong, dilaman rumah nan gadang. Tatkalo samaso itu anjiang nan kumbang panjang bulu, sadang lalok-lalok ayam, didakek jalan pintu korong, sabagai panjago urang masuak, sadang tapauik jo talinyo. Tibo dubalang tantang itu, mamandang elok anjiang kumbang, tatariak hati nan didalam, timbualah ingin bapamenan, tali baniat nak mangganggam, lalu dituruik dihampiri. Lah dakek katalinan tapauik, tangan manjambo nak mangakok, anjiang mamandang kadubalang, sambia maliek katuannyo. Maliek rupo nan bak kian, dek diri si  Sutan Balun, anjiang dikijok jo isyarat, kumbang disuruahnyo mamberang, manggigik dubalang Sutan Maharajo Basa. Tantangan kumbang panjang bulu, sajak ketek jo Sutan Balun, masak ajaran sajak jolong, baru dikijok nyo lah tahu, lah

mamberang kumbang sakali,  sambia malompek kadubalang, gigi nan tajam lah malukoi, jantuang batih lah kanai saying, tasirah darah nan mahilia, parah dubalang luko kaki. Baru dubalang lah tapakiak,nan diri Sutan Maharajo Basa lalu malengong kabalakang, baitu pulo Sutan Balun, capek mangajanyo sakali. Lorong dek diri Sutan Balun, diambek  anjiang dimarahi, dialiah pautan kanan asiang. Sasudah  anjiang dipauikan, diliek luko dubalangtu, lalu diubek ditawari, tapi lukonyo nyato dalam, payah dubalang manangguangkan. Mamandang kajadian nan baitu, pihak didiri Sutan Balun, manaruah hibo dalam hati, jatuah kasihan kadubalang. Tapi tapaso dilakukan, untuak manjadi kanyataan, nak tacapai cinto nan baiak, bangkalai tujuan nan dahulu, nak langsuang dimaso kini, rakyat nan banyak nak santoso, nak aman koto jo nagari. Agaklah dihari nan saharitu, urang nagari lah mulo datang, handak manamui si Sutan Balun, mamandang luko dubalang, lah rintang dirago itu pulo, samo rusuah mamandangi, lah lalai naiak karumah. Kaba barito bahayotu, lah tewak sapanuah kampuang, lah kambang masuak nagari, urang nan datang kakian, lah ingek manjago diri, jan maampiri anjiang kumbang. Namun nan tumbuah malang nantun, lah manjadi buah bibia, jadi pamikiran cadiak pandai, dubalang lah nyato taaniajo, digigik anjiang pamenan, patuik dituntuik urang nan punyo, aia nan janiah nak nyo dapek, salah jo bana nak tarupo. Nyato salah patuik dihukum, luruih hutang wajib dibayia, adia nak tabao ditampatnyo, disiko tampat urang maninjau, mancubo rang gadang nan baduo, ba’ako tumbuah nan baiko, anjiang baliau nan manggigik, dubalang urang nan taaniajo. Laiko undang dikarasi, sudi siasek lai bajalan, hukum batimbang lah ko garan, ataukah tingga tanang sajo, kok tibo diparuik dikampihkan, tibo dimato dipiciangkan. Itu dek umum nan tapikia, samo mananti maso itu, kudian baru mangko nyato, saat kutiko balun lai jaleh. Agaklah Sutan Maharajo Basa, lah senjang sagalo bedo, lah sulik kamari antah, rumik bapikia dalam hati, payah batenggang dalam gaib. Kok tidak ditimbang diadili, tidak diusua jo pareso, dimano hukum kabajalan, umum maraso dalam hati, tak sanang rakyat dalam nagari, hilang picayo kanan tuo, tampan nagari tak salasai. Kok dibao kabalairong, didakwa Sutan Balun, cameh tasingguang adiak kanduang, rusuah kok ratak duo kali, nan lamo luko  balun lai sambua, ganggang baru kabatuik, kini kabaulang pacah, itu nan labiah nyo pikiakan. Dalam tanang aniang sajo, Sutan Balun lah nyato paham, tampak manggamo nan kuaso, gamang Sutan Maharajo Basa, manjadikan pakaro nan tumbuahko. Alah sahari duo hari, lah labiah dari tigo hari, sasudah sangketo tumbuah, usua tidak pareso tidak, dek Sutan Maharajo Basa, lah tarapuang-apuang tak anjuik, tarandam-randam tak basah, lah ragu hati Sutan Balun, urang banyak baitu pulo. Pihak dek diri Sutan Balun, dek tak sanang dalam hati, cinto niatan nan tak kalangsuang, lalu dituntuik ditabikan, kapado Sutan Maharajo Basa. Sampai disabuik nan taraso, malangko kok tidak diurusi, mungkin rakyat hati tak sanang, habih picayonyo kasudahan, kapado rang gadang nan kuaso, pucuak pimpinan dinagari. Kalau tasuo nan baitu, lah nyato gadang mularatnyo, hilang darajat pamarintah, Maharajo Basa manangguangkan. Baru mandapek rundiang itu, tapaso Sutan Maharajo Basa, malangsuangkan jadi parkaro, nak aman koto jo nagari. Lah sampai limo hari ganok, sasudah anjiang manggigik tu, basidanglah urang nagari, dubalang jo ampang limo, jo manti pagawai adat, diateh balai balairong, nan banamo balairong sari, tampatnyo di Tabek nagari Limo Kaum. Kutiko disidang nan rapek tu, urang didalam korong kampuang, samo ingin nak mandanga, banyak nan datang kabalai tu, maliek urang bapakaro, mananti putusan hakim, apo hukuman nan ka jatuah, dimano kubangan undang. Lah rapek sidang balairong, lalu diusua dipareso, sampai dakwa lah bajawab, usua pareso lah bajalan, tuntutan kapado Sutan Balun, salah dek anjiangnyo lah manggigik, tuduah kainyo tatapeknyo. Namun dek diri Sutan Balun, diakui anjiangnyo nan lah manggigik, sampai marusak malukoi, dimuko umum nan basamo. Sutan Balun nan manamoi, kajahatan nan caro itu,  “ undang putiah

tabang siang” tali banang tambangnyo tulang, tabangnyo manangah koto, hinggok dikayu maranggeh, basuluah matohari, bagalanggang mato urang banyak, tak dapek batidak lai.  Tapi sungguahpun baitu, cubolah samo didalami, undang siapo nan mambuek, pi’il siapo nan marusak, sampai manyakik malukoi, luruihlah waknyo nan didakwa. Kiniko anjiang nan manggigik, itu nan patuak kadidakwa, cukuik sarat jo rukunnyo, tak dapek kamungkia lai, kini dakwa nan mandating, adok kadiri Sutan Balun, tidak baliau manarimo, dakwanyo tulak dengan nyato, anjiang nan patuik kadidakwa. Pihak diumum nan rapektu, tasabuik nan duduak dalam sidang, sarato urang nan mandanga, samo maiyokan kasamonyo, kanyataan rundiang nan katangah, dari jawaban Sutan Balun. Pihak disidang karapatan, mandanga dakwa jo jawabnyo, tatariak bana pamikiran, samo sapaham urang banyak, mambatuli jawab Sutan Balun, luruih dakwa ditulaknyo,  anjiang babuek kajahatan, disitu dakwa takanaknyo. Sajak paningga Sutan Balun, urang banyak dalam nagari, taragak sungguah dalam hati, nak mandanga pandapek Suatn Balun, sabab salamonyo tinggakan, rapek hilang sumaraknyo, lah hilang ayam nan pautan, kukuak tak tadanga lai, sunyi sajo digalanggang, dingin didalam karapatan. Kiniko mulo jolong tibo, lah tibo sakali sangketonyo, nan sulik jarang tumbuahnyo, itu nan labiah manariak, nak maliek jo mandanga, buah putusan nan katibo. Dalam diragu nan baitu, pihak didiri Sutan Balun, lalu pandapek dilahiakan, kapado sidang nan basamo. Manuruik paham Sutan Balun, tantangan kajahatan nan tumbuahko, lah basuluah matohari, dimuko umum nan basamo,  anjiang nan manggigik dubalangko, hakimpun samo mamandangi. Sabab karano damikian, walau tidak usua jo pareso, tidak dakwa dengan jawab, salah lah nyato pado anjiang, nan malakukan kajahatan, malangga aturan undang-undang, lah tampat hokum badirinyo, wajib dek hakim mamutusi, manjatuahkan hukum kanan salah, mintak supayo dilakukan. Sasudah pandapek nyo lahiakan, dek diri Sutan Balun, surangpun tidak manyalahi, sasuai jo paham nan basamo, hukum lah patuik dijatuahkan, kahakim pulang karajoko. Baitu kato kabulatan, diunjuakan pado kanan kuaso, iyolah kapado Sutan Maharajo Basa.  Pihak didiri Sutan Maharajo Basa, ditiliak tata barih hukum, nan banamo tariak baleh, lah senjang bana malakukan, urang nan kamanggigik anjiang, mungkin lai patuik atau tidak, urang nan banyak pahamnyo samo, disa’at nan nyato caro itu, Sutan Balun mauling usua nan saisuak, nan tatulak dahulunyo, dek Sutan maharajo Basa. Pihak dek umum sabanyaktu, sasuai paham kasamonyo, manuruik usua Sutan Balun, sampai diunjuak dilansuangkan, kapado Sutan Maharajo Basa, pihak di Sutan Maharajo Basa, sanan tak dapek bakisa, tak mungkin mailak lai, tariak baleh wajib dicabuik, dicari nan lain kagantinyo, nan adia sarato mauntuangkan, kapado rakyat jo nagari. Disa’at katikotu insyaflah diri Sutan Maharajo Basa, dipham salah nan dahulu, hawa napasu dituruikan, rusuh didunia kalangkahan, dangki diadiak kabatuah, kinilah baru disasali, jahek sangko nan saisuak, lalu dibuang hanyo lai, dituruik paham nan basamo, manarimo anjuran Sutan Balun, kini basamo mamikiakan, bulek nak tibi goleknyo, tasuo kato nan dahulu:

Nan bana tidak barubah.  Nan tidak ratak diambalau.  Haram kok kuniang dek basadua.  Walau bamusim dalam tanah.  Miki batahun dalam tanah  Nan tareh paralu timbua